Ballade vom Nationalrat Hugo Sanders Songtext / Lyric

Mani Matter
Ballade vom Nationalrat Hugo Sanders Lyrics

Wo als Kandidat der Hugo Sanders gred het vor der Wahl het jede gmeint wenn dä einisch gwählt sig wärd alles anders und drum hei ä hufe Lüt vereint
s Losigswort usgä wählet de Sanders de wird’s ir Schwiz de ändlech anders

Nach sir Wahl het är äs isch begrifflich zersch chli zuegluegt wies im Rat so geit
de bevor mes überleit het riflech isches ja gschider das me nid zvil seit
aber wartet nume het de Sanders gseit gli wird’s ir Schwiz de ändlech anders

und är het sich gründlich igarbeitet und het gwartet uf nä Glägeheit
mit der Red wo är het vorbereitet einisch z säge was süsch niemer seit
wenns de mal sowit isch het de Sanders gseit de müesst dir luegä de wird’s anders

d’Glägeheit isch lang nid cho hingäge hets ne afo dünke mit der Zyt
was er da sech vorgno gha het z’säge stimmt ja scho doch gängs villivh chli zwit
s’isch nid ganz so eifach het de Sanders gseit ig vormulieräs gschider anders

är het gwüssi Iwänd müessä zuegä und het Detaills gha wo nid hei gschtimmt
und ig muess ou het är dänkt druf luegä dases der Bundesrat nid übel nimmt
mit em Kopf dür d’Wand so het de Sanders gseit das nützt ja nüt de wird’s nid anders

är het korrigiert ergänzt und gschtriche immer wider a sir grosse Red
so isch’s cho das d’Amtsdur isch verschtriche ohni das er je se ghalte het
mänge wird de Sanders jetz uslache und wird dänke ja das chunt dervo
die wo sälber nüt wei anders mache lache sicher bsungesrs schadefroh
darum machet’s anders als de Sanders nämlich machet’s anders wird’s nid anders
darum machet’s anders als de Sanders nämlech machet’s anders wird’s nid anders